sugnu un cani da a vostra razza

l'ancili cci mpristavanu l'ali
san petru grapeva i porti
e a munnizza traseva mparadisu

Non lu dicu iu
iddu u dicinu
iu u pueta fazzu
caminu supra i negghi
leggiu nto cielu
cuntu i stiddi
parru cca luna
acchianu e scinnu

u pueta fazzu: tessu, raccamu, cusu, scusu:
arripezzu cu fili d'oru! Adornu allisciu
allustru decoru senza culuri! Ntrizzu sciuri
apparu artari, chiantu banneri: abbillisciu u munnu,
carmu u mari cca a vuci! Sugnu un jardinu di sciuri
e mi spartu a tutti
una cassa armonica e sonu ppi tutti
n'agneddu smammatu e chiangiu ppi
tutti l'agneddi smammati
Chi mi cuntati? Iu u pueta fazzu: amu i tavuli cunsati, i piaciri, u lussu
Amu i dinari (a bumma atomica nni i manu di l'omu, nni u cori di l'omu e nun scatta)
U pueta fazzu e vogghiu a paci nta me casa
ppi scurdarimi a guerra nte casi di l'autri
A cuitutini nta me casa
ppi scursarimi u tirrimotu ntre casi di l'autri: sugnu un cani da a vostra razza
un mi manca nenti nun disidiru nenti
sulu na curuna ppi ricitari u rusariu a sira
e nun c'è nuddu ca mi la porta di firru filatu
ppi nchiaccarimi a un palu!

(da: U rancuri, discorso ai feudatari, di Ignazio Buttitta)